Decretum

Cum novum in Urbe Collegium consilio et impulsu Pontificii Operis a Sancto Petro Apostolo anno nuper elapso fundatum et inchoatum sit, cui finis est propositus sacerdotes cleri saecularis excipere ex territoriis Sacrae Congregationi de Propaganda Fide subiectis oriundus, ut ecclesiasticis studiis academicis seu universitariis in hac Alma Urbe totis incumbant viribus sicque ad sua munera in nativis suis missionibus facilius explenda se praeparent, Sacra haec Congregatio Christiano Nomini Propagando, post jam probatam fundationem eiusdem Collegii a Sancto Petro Apostolo nuncupati, hoc ipsum per praesens Decretum canonice erigit.

Missionalis ita erecti Collegii incremento supra memoratum Opus Pontificium, favente Domino, prospiciet eique etiam necessaria atque opportuna alumnorum sustentationis media, sumptus quoque ad aedes instruendas ac tuendas et ad res id genus ceteras suppeditabit, iuxta deliberata a Consilio Superiore Generali dicti Operis, per eiusdem Praesidem, infrascriptum huius Sacrae Congregationis de Propaganda Fide Secretarium, huic eidem S. Congretationi suo tempore patefacta.

Datum Romae, ex Aedibus Sacra Congregationis de Propaganda Fide, in festo Cathedrae Sancti Petri Apostoli Romae, die XVIII mensis Januarii A.D millesimo nongentesimo quadragesimo septimo.

Petrus Card. Fumasoni-Biondi                                                                                                                                                                       + Celsus Costantini
Praefectus                                                                                                                                                                                                        Archiepiscopus tit.
                                                                                                                                                                                                                     Theodos . a Secretis